الاثنين، 13 مايو، 2013



ايه لزمة البنت فى حياتك ؟!!

(1) راجع من شغلك لو كنت بتشتغل أو من الكلية أو المدرسة لو طالب أو من القهوة لو كنت عاطل ..طالع عينك وعرقان .. جزمتك بقت جزء من رجلك وحاسس إنها مش هتخرج .. القميص أو التي شيرت بيسبلك ونفسه يقولك متبقي تحط مزيل عرق يا متخلف .. شعرك اتبهدل وبقي زيه زي شعر صدرك وبقيت شبه ساكن كوكب بلوتو لما شعره يبوظ (لو كان سكان بلوتو شعرهم بيبوظ يعني !!)

عمال تحلم بكوباية شاي أو كوباية لبن سخن ودش دافي وسرير تفرد أطرافك عليه قبل ما تسيبك وتقع .. عينك حارقاك من كتر مية العرق المالحة اللي جواه .. حالتك تصعب ع الكافر .. تفتح باب الشقة تلاقيها مستنياك .. ومجهزالك العدة اللي هتريحك .. السخان جاهز والأكل حالا هيبقي ع السفرة يا حبيبي

...............................................................................................

(2) طالع عينك في الكلية وشكلك هتشيل السنة .. متخانق مع الحاج في البيت كالعادة وشكله نفسه يطردك .. مش معاك ولا مليم أو ده هيحصل بكره أو بعده بالكتير وملكش عين تقوله فلوس يا حاج لأن الرد مش هيكون بالبق .. أعتقد شباشب الحمام اتعملت عشان تترفع في الهوا وتنزل على الحته اللي ربنا يكرم بيها ومعاها بق مفتوح على آخره "انت مش لسه واخد مني من يومين يا بن ال..... لحقت تخلصهم ؟؟ .. هو انت بتقعد على قهاوي ولا بتشرب ... الخ" كلام من هذا القبيل .. واحد صاحبك مضايقك وبيعمل فيك اسفينات عشان بيكرهك .. الدنيا مكركبه على دماغك آخر كركبه .. طب تموت نفسك ولا تهرب من البيت ولا ... (( مالك بس يا حبيبي ؟)) .. هتسمع منها الكلمه دي هتبص في عينيها وتحكي اللي جواك .. هتسيب دموعك تتمشي على خدك وايدك تحضن اديها وتقولها أنا مخنوق .. هتلاقي أحن ايد وأحن ابتسامة وأحن نظرة تخليك تقول للدنيا إنك راجع تاني وكل مشكلة وليها حل .. ومعاها.. هتلاقي الحل بسيط كمان ..

...............................................................................................

(3) الماتش بكره ووعدت أصحابك انك رايح معاهم الاستاد وكله جاهز .. يومها بالليل فلوسك خلصت ع القهوه .. هتتصرف ازاي؟؟ كارثه .. مينفعش تقول مش رايح هتطلع عيل .. قسط الدي اس ال بكره ومش معاك ولا مليم وهيبقي شكلك زباله قدام الواد جارك .. بكره قسط الجمعية اللي انت اتدبست فيها ولازم يتدفع لينفخوك .. طب يا نهار أزرق ده مفيش ولا مليم .. وفي كل الحالات هتجري على اختك الكبيره ... اا حايح .. هتلوي بوزها وتبصلك نظرة بمعني يا لهوي عليك انت مبتبطلش ؟؟ .. بس في الآخر الفلوس هتطلع ومشاكلك هتتحل ..
(( بس المره الجايه مش هعبرك حافظ على فلوسك شويه يا أخي انت ايه ؟؟ وابور ؟ ))


** الحياة من غير بنت تحبك _ أيا كان دورها ونوع حبها ليك _ هتبقي ضلمه وملهاش لزمه .. مين اللي قال إن البنات نص الحياه ؟.. البنات هما الحياه كلها .. ونص !!